في محاولة لتبسيط بعض الأجزاء في النتورك

في محاولة لتبسيط بعض الأجزاء في النتورك .. هنتكلم ببساطة عن ال DHCP Relay

ببساطة في الحالة الطبيعية ..

لو عندك شبكة فيها 50 جهاز .. فمش من الطبيعي إنك تروح تدي IP Manually لكل جهاز .. فيه حالات معينة اضطريت اعمل فيها كده .. لكن فعلا كان الأمر اشبه بالكابوس .. خصوصا لما اكون عند جهاز معين و اقول في عقل بالي (هو انا اخر جهاز كنت مديله IP كام) !!

ال DHCP بروتوكول .. و البروتوكول هو آلية عمل أبلكيشن .. فلو عندك Application DHCP .. يقولك انا هوزع ال IPs بالنيابة عنك يا باشمهندس ..

و هنا عندك حالتين لل DHCP:

أولا : إما يكون عندك Local DHCP Server لكل VLAN !

ثانيا: إما يكون عندك Remote DHCP Server و ده اللي بنسميه DHCP Relay

في حالة ال Local DHCP .. الجهاز عشان ياخد IP بيحصل الآتي:

أولا: يبعت باكت DHCP Discover .. عاملة زي السونار كده .. رسالة برودكاست .. لأنها جاية من source MAC بتاع ال PC و Destination  MAC
ffff.ffff.ffff

و بيطلع من Source Port 68 .. و بيروح على Destination Port 67

يستلم ال DHCP-Server .. و يقول ايه ده !! يا PC ياللي ال MAC بتاعك كذا .. عايز IP !!

يبص عنده في ال Pool .. المتعرف عليها ال Network Range .. اللي بتمثل ال Broadcast Domain أو ال LAN اللي فيها ال PC

"لو هنتكلم عن سيسكو بتشتغل ازاي في ال DHCP" .. يبص على حاجة إسمها Current Index .. و انا بحب اسميه عشان الطلبة تفهمه ال Next Available IP ..

بفرض الشبكة 10.0.0.0/24 .. و الراوتر نفسه هو ال DHCP-Server .. وواخد 10.0.0.1

فأول PC هيطلب .. الراوتر يبص في ال Current Index هيلاقيها
10.0.0.1 قبل ما يدي ال PC ال IP ده !! .. يستكشف هل موجود ال IP ده في الشبكة ولا لأ .. لانه لو موجود هيحصل Conflict

هيقول ايه ده !!! ده انا 10.0.0.1 !! .. هيغير ال Currend Index ل 10.0.0.2

وبرررررضه .. قبل ما يدي ال PC ال IP .. يبعت ARP Request تروح لكل ال Available Active Nodes عالشبكة يقول فيها .. الجهاز إللي ال IP بتاعه 10.0.0.2 !! .. يبعتلي ال MAC

لو مجالوش ARP Reply .. معناه 10.0.0.2 مفيش جهاز واخده .. مش كده !!

يقوم ال DHCP Server يبعت ال DHCP Offer .. وديه بقى باكت unicast رايحة على الماك بتاع الجهاز و طالعة من ماك ال dhcp server و رايح على بورت 68 عالجهاز "اللي الجهاز كان خارجة منه ال DHCP Discover" و يطلع من بورت 67 "اللي الجهاز كان باعت عليه ال DHCP Discover"

يقول فيها للجهاز .. ينفعك ال IP اللي هو 10.0.0.2 ??

ال PC يقوله أيوة ينفعني و يبعتله (ايوة ينفعني ديه) في باكت إسمها DHCP Request و يقوله فيها إعتمدلي يا DHCP-Server إني انا ال PC صاحب الماك الفلاني اخدت ال IP 10.0.0.2

ال DHCP-Server يغير ال Current Index لإيه بقى !!!!

10.0.0.3 >> مش كده ؟؟

في حالة بقى كان ال DHCP Server بره ال LAN اللي فيها ال DHCP Client .. هيحصل مشكلة ..

ايه هي ! .. ان باكت ال DHCP Discover ديه يا شباب .. برودكاست صح !

طيب طالما ال DHCP Server بره الشبكة .. يبقى لازم البرودكاست باكت ديه توصله مش كده !! .. يعني اكيد لازم تعدي على ال Default Gateway اللي واقف على الشبكة الي فيها ال PC ..

أحد قواعد ال Router (((أنا مبعدييييش برودكاست من interface ل interface)))

الله !! طيب يا راوتر كده ال DHCP Discover مش هتوصل لل DHCP-Server

قالك ال Router .. هحلهالك !!

يا باشمهندس .. بما انك عارف ال IP بتاع ال DHCP-Server عرفني ال IP ده و اي DHCP Discover Packet هستلمها !! هقوم مفرودها as a unicast باكت لل DHCP Server .. و السيناريو هنا هيكون كالآتي

ال PC هيبعت DHCP Discover .. بالمعلومات الي ذكرناها

ال Router هيستلمها .. هيقوم معدل فيها شوية حاجات .. هيطلع ال DHCP Discover و يكانها خارجة من ال IP بتاع ال Router اللي موجود في الشبكة اللي فيها ال PC .. و يخرج على IP بتاع ال DHCP Server !!

ال DHCP Server هيستلم و يبص في ال Pools الخاصة بالشبكات اللي بيوزع فيها

فمثلا لو ال DHCP Server هيوزع لشبكتين
LAN 1 10.0.0.0/24
LAN 2 192.168.1.0/24

فهيروح يبص على ال source IP بتاع ال DHCP Discover اللي جايله هيلاقيه 10.0.0.1 اللي هو IP ال Router .. صح !!

يقوم قايل إذن انا هديك IP من LAN 1 و هنا بقى قبل ما يبعت ال DHCP Offer مش هيبعت ARP Request لانه مش موجود في الشبكة الي فيها ال PC صح !!

هيعمل Ping بقى على ال IP اللي في ال Current Index و لو استلم Echo Reply !! يبقى كده ال IP Busy و يزود 1 على ال Current Index .. طيب لو مفيش Echo Reply .. هيبعت ال IP في ال DHCP Offer

و يوديها على IP ال Router و ال Router يستلمها و يوديها للجهاز الي كان طالب ال IP .. و يكأن ال Router هو ال DHCP Server بالنسبة لل PC

لكن Actually !! هو مجرد وسيط او ديلر و لذلك يسمى الراوتر في هذه الحالة !! DHCP Relay Server

بالتوفيق !! ^_^