IT سواء كان Network او Database او Security او Administration

البوست دة نصيحة بجد مش هيعرف قيمتها غير الي هيدخل سوق العمل جديد ان شاء الله في مجال ال IT سواء كان Network او Database او Security او Administration او اياً كان.....انا حاطط في البوست دة ملخص كل الغلطات الي انا وقعت فيها عشان أوفر علي الناس الوقت و المجهود عشان متغلطش نفس الغلطات... :
البوست طويل شوية بس متهيألي هيفرق ف مستقبل ناس كتير لأن كل الكلام الي فيه عن تجربة :

أول جزء في البوست بيتكلم عن سؤال واحد : " ازاي تتعلم اي كورس من مجال ال IT ?!
الجزء دة مخصص للناس الي لسة داخلة جديد او حتي لسة بتتعلم....
مبدأياً #أول نصيحة : حاول متوقفش حياتك الدراسية علي المحتوي العربي لأن المجال بتاعنا أصلاً مجال English يعني مش كل ما تحتاج كورس ولا شرح لحاجة تدور علي حد شارحها بالعربي لأن هو نفسه أصلاً اتعلمها بال English طب انت احسن منه ف ايه ؟! ناقصك عنه ايه عشان تتعلمها من نفس المكان و من نفس الشخص الي علمهاله هتقولي ناقصني اللغة هقولك تمام ....اللغة عمرها ما كانت صعبة انك تتعلمها اللغة بس محتاجة جرأة شوية....90% من الناس الي مش متعلمة English الي مانعها هو خوفها من الناس انها تتريق عليهم في الأول لو كان النطق غلط او مش عارفين معني كلمة معينة او حتي كان ال English بتاعك في الأول زي ما بيقولوا English صعيدي (مع كل احترامي للصعايدة)....ايه المشكلة لما الناس تتريق عليك و في الاخر هتتعلم و انت الي هتتريق عليهم بعد كدة ؟! خلاصة الكلام عشان مطولش الكلام في الحتة دي ان فيه Resources كتيرة انك تتعلم منها English بس نصيحة عن تجربة شخصية ابدأ اتعلم من ايهاب رمزي الراجل دة شخص عظيم بجد و انا شخصياً اتعلمت و بتعلم منه هتلاقوا كل حاجة شارحها هنا في اللينكين دول : https://goo.gl/XA7CEH , https://goo.gl/Q3ZczD

تاني جزء في البوست بيتكلم عن سؤال : ليه اللغة مهمة ؟!
#تاني نصيحة : انا مبقولش ان المحتوي العربي مش كويس لكن بقول انه مش كفاية خالص لو المحتوي العربي بيقدملك 50% من الكورس المحتوي ال English هيقدملك 85% من الكورس لأنهم لما بيعملوا كورس بيكون فعلاً مصروف عليه بيبقي فيه فريق للاعداد بتاع المحتوي و فريق لل Graphics بتاعت الفيديو وال Instructor الي بيشرح و بعد كدة فريق ال Sounds Engineering و فريق ال Montage و ال Edit لحد في الاخر ما يطلعلك كورس زي كورسات CBT-Nuggets ولا VTC ولا INE ولا Lynda ولا غيرهم....انما عندنا في المحتوي العربي ال Instructor هو الي بيعمل كل الي انا قولت عليه ف غصب عنه مستوي الكورس بيطلع مش كويس دة غير ان فيه كتير من ال Instructors العرب للأسف كورساتهم علي النت بتبقي عبارة عن تسجيل لشرح هو بيشرحه لناس قاعدين معاه في ال Center الي هو بيدرس فيه فا ف نص الفيديو تلاقيه بيكلمهم و كمان جودة الصوت بتبقي سيئة جداً بتخليك مش حابب تكمل الكورس اساساً.....ف هنا بقي تيجي حتت اللغة هي الي هتنفعك عشان تعرف تذاكر ال Courses بتاعت مثلاً CBT ولا Lynda ولا Pluralsight ولا اي شركة تانية

تالت جزء و أهم جزء في البوست كله بيتكلم عن سؤال : ليه اخد شهادة في الكورس الي انا بذاكره و امتي اخد شهادة الكورس و امتي اكتفي بس ب مذاكرته ؟!
#تالت نصيحة : الناس فاكرة ان ال CV الحلو بيبقي بكترة الشهادات ف تلاقي ناس تقعد تجمع شهادات بس متاخدش بالها ان مجالات الشهادات الي هي جمعتها دي ملهاش اي علاقة ببعضها
يعني تلاقي CV مثلاًَ واخد شهادة في البرمجة مع شهادة في ال Database مع شهادة في ال Netowrk مع شهادة في ال Security و تلاقيه مقدم علي شغلانة في ال Infrastructure طب معلش هو انت لما تشتغل Integrator انك تركب الاجهزة و ال Network Components بنفسك و تعمل ال Configuration و تظبط ال Routing و ال Switching و الكلام دة كله هتنفعك ف ايه ال Database و ال Programming ساعتها !؟ ولا اي حاجة عشان كدة ال CV بتاعك بيترفض مع انك ممكن تكون مؤهل للوظيفة لكن ال CV بتاعك مش متناسق يعني اي حد بيشوفه هيقول عليك Certification Collector راجل بيجمع شهادات و خلاص لأن بالعقل مفيش حد هياخد شهادة مش هتفيده....اخر حاجة و اهم حاجة الي للأسف بنشوفها كتير الأيام دي هو المفهوم الغلط عن فكرة ال Dump بالنسبة للعرب كلهم مش هقول المصريين بس....المفروض ال Dump دي بتبقي معمولة عشان انك تشوف شكل الامتحان عامل ازاي و انك تجاوب علي الاسئلة بتاعت المنهج الي انت ذاكرته مش عشان تحفظ ال Dump عشان تدخل ترصها في الامتحان و تاخد الشهادة و انت لاموأخذة مش فاهم اي حاجة ف اي حاجة و اسمك في الاخر Certified...كارثة كبيرة بالنسبة لكل الناس الي تقعد تدور علي اخر Valid Dump انهم ميعرفوش ان الشهادة مش هتنفعهم ف حاجة لما يدخلوا Interview و ميعرفوش يجاوبوا لأنهم اساساً مش فاهمين الكورس....كام واحد واخد CCNA و CCNP و MCSA و هو مش فاهمهم 100% و خد الشهادة بس عشان كان حافظ ال Dump ?! الناس دي اول ناس بتترفض في ال Interviews لأن الشركات دلوقتي بقت ناصحة و بقت تعرف تسأل الاسئلة الي تبين الشخص دة فاهم فعلاً ولا حافظ Dump و دة خد شهادة و زي ما دخل زي ما خرج...

اتمني الناس تاخد بالها من ال 3 اجزاء بتوع البوست لانهم هيفرقوا جداً جداً ف حياتكم ان شاء الله لأن كل الكلام دة تجارب و خبرات شخصية مش مني انا بس لأ دة من ناس كتير جداً.....و اتمني ان شاء الله ربنا يوفق كل الناس ف حياتها و مستقبلها....